ديوان الشاعر تركي الميزاني

الله ولا الهاجس اللي مايريحني
اسهر عيوني وعناني وعنيته

احاول اخفيه مير الحزن يفضحني
متمركز بالحشى كل الحشى بيته

ياللي تعاتب غموضي لاتوضحني
ماباقي في الخفوق الا تناهيته

اصافح الهم قبل انه يصافحني
واحب خشمه واردد في الخفى ليته

ليته قبل لاتزل خطاي ينصحني
ولا يريّح خفوقي من عفاريته

والغالي اللي عليه الشوق ذابحني
اقفى به الوقت ماجاني ولاجيته

ياسيد الغيد قبل اقول لك بحني
بخبرك عن كلام عنك خفيته

تدري وش اكبر خطاي الله يسامحني؟
اقفايتي عنك وانت اللي تمنيته

وهذا هو اللي معذبني وجارحني
اقول ابنساه وانا ماتناسيته

السلسال

على الهون ياجرح المفارق وضيق البال
على الهون ياهم(ن) سطا بي وقدرته

اعزك لوانك جرح ومجاهدك قتال
وروضت جسمي لاجل سقمك صبرته!

لاجل من ملك قبي من الجال لين الجال
وفجيت له باب عن الناس سكرته !

وحطيت له عن شمس قيظ الغرام اظلال
وشيدت له بيت بقلبي وعمرته !

عشقته ودللته وجريت له موال
وتخيرت قربه ليتني ما تخيرته !

رعي ريف قلبي لين صار الحشا مدهال
وعن مدهله جنبت غيره وذيرته !

سقيته من عدود الغلا والغرام زلال
بعد ماجذب من دم قلبي وصدرته !

اداري عليه من الزعل وازعل العذال
وخطاه ان كبر في عين غيري تصاغرته!

ترافقت انا وياه من يوم كنا اطفال
تكون غلاه بوسط قلبي وكبرته !

قبل مايغطي ليله المنتثر بالشال
سرقت الكرى من نون عينيه وسهرته!

نقش كل حرف من حروفي على السلسال
تباهى بها واغاظ ناس مجاكرته !

وكتبت القصايد في عيونه علي اليامال
وليا مرني صوت النواخذ تذكرته

تكاثر علي الله يجازيه كيف الحال
وانا يوم اسوق العمر له ما تكاثرته !

وبعد كل هالتقدير والحب والاجلال
تغير وهقواته عليه مغيرته!

لبسته ثياب الغطرسه لين جا يختال
وكبر في عيونه يوم الاوهام غررته !

واذاالسالفه ضحك ومهازل ولعب اطفال
خبطت الغصن لين ابرق الريش طيرته !

خلصنا وقفلنا الصناديق با لاقفال
ومن جور حكمه كامل القلب حررته !

يا مالك الملك

يا مالك الملك يالواحد شديد العقاب
يا غافر الذنب يا مرسل رسولك نذير

يا خالق الخلق يا محصى الخطا والصواب
تعالت اسماك مالك في صفاتك خشير

يا محي الارض بأمرك من حمول السحاب
يا عالمن فالحياة وما يؤول المصير

يا جامع الناس في يوم الحشر والحساب
مافيه فرقٍ هذا تاجر وهذا فقير

كل الخلايق سوا الا بحمل الكتاب
لا شخصت ابصارهم يوم النهار العسير

احدٍ فتح له كتابه صوب جنتك باب
واحدٍ هوابه اكتابه للسخط والسعير

يا رب رحمتك لا هلو علي التراب
واصبحت مالي عن الوحشه مفر ومطير

واقفوا ولدموعهم فوق الخدود انسكاب
واسمع قريع احذيتهم فالوداع الاخير

ودخلت في عالم البرزخ وطال الغياب
وفارقت كل القرايب والاهل والعشير

وجوني ملائكتك العمل والعذاب
استسلمت نفسي لمنكر وجاني نكير

في موقفٍ للسؤال يزيد ثقل الجواب
الا برحمتك اللي فالخفايا خبير

يا رب حملت نفسي بالشقا والعتاب
ومديت حبل الخطا لبليس واصبحت اسير

وطاوعتها في متاهات الوهد والسراب
لين اشبكتها الخطايا شكب والنفس طير

ازل واقول انا توي بسن الشباب
واليا نصحني محب اقول توي صغير

ما كنت احسب لوقتي والليالي احساب
ولا كنت افكر وش اللي في زماني يصير

الا بعد ما نصفت العمر والراس شاب
وفقدت من ربعي الادنين جمعٍ غفير

عرفت ان الحياة مصارعه واكتئاب
واني مودع ولالي غير ربي نصير

ومن لا تزهب من التقوى لنفسه زهاب
لا مات وش حجته يوم النهار الكبير

فالموقف الي مافيه امجادله وانسحاب
منهوله لهاك النهار يشيب راس الغرير

لكن اليا اذنب نبي آدم واعترف ثم تاب
الله يغفر الذنوب وينصر المستجير

ياحرفي اللي ضاع

ياحرفي اللي ضاع مابين الدفاتر والرفوف
اللي رسمته من تنهَّاتي ومن حبر قلمي

ضحيت لجله في حروف وقمت لجله في حروف
وصبرت لو النار من فوقي ومن تحت قدمي

ياصاحبي اللي على شانك تحديت الضروف
اسمع كلامي زين وافهم وش اقوله من فمي

ماهو بأنا اللي تتركه بين الخناجر والسيوف
وتمص دمه بين خلق الله يامصاص الدمي

انا بدويٍ ماسكن في الوقت مسكان الضعوف
اتبع هوا بالي واسير عند ذودي وغنمي

طوفتها لك لجل خاطر عين ولا ماتطوف
ولا انت مهما زاد وزنك وزني يطرحك نسمي

صمتي يدل اني وفي ومسويٍ فيك امعروف
وصبري يدل اني من زحول الصناديد انتمي

ياقوم ياللي تذبحون الحيل قدرٍ للضيوف
وش رايكم في اللي يعشيني من اوصال لحمي

وقفت له يوم اجلسوا واجلستله ناسٍ وقوف
غير الذخيره والفشق في محزمه من محزمي

يا طير وضبتك بتدريب

يا طير وضبتك بتدريب
ابي اصوع بك هدادي

لاطارن الربد المهاريب
اللي ذاريات من العوادي

القف بهن عساك ماتخيب
واقصد لقايدهن عنادي

خمه براسه خمة الذيب
وعليك ما ظنه بادي

ياسعود لاتنشد عن الحال ياسعود

ياسعود لاتنشد عن الحال ياسعود
الحال ولى فالزمان المولي

والجسم الاقشر قام ينحل كما العود
والهم خاويني معي ثل ظلي

لو قلت لك موجود ماني بماجود
اظحك واجامل واحدن مافطن لي

متبعدن عن كل شاذب ونمرود
ومنزحن بين الخلايق محلي

ياسعود يوم الهرج له قن وحدود
وداني اكتبلك عن الي حصلي

والي حصلي له مصادير وورود
اقفت صدوره والورود اقبلني

من عقب ماسافر على زورق النود
عود وجا من سفرته راجعن لي

واول جوابه لي مقابيس وزنود
ونارن تشل اطراف الاظلاع شلي

وان قلت مالك من ورى القلب مقصود
وان كان لك مقصود عبر وقلي

تال الزمان يبين البيض والسود
لاتحسبني راجعن لك تسلي

وان قلت وش رجعك لافدت بالفود
قال انشد الي جابني من محلي

ماجابه الا من يقود الهوا قودقود
البعير اليا امتنع لايفلي

الصاحب الي دونه الحزم ممدود
بقصى جبالن حيدها عارضنلي

ارسل مراسيله يبى العلم موكود
ياليت مرسوله جلس ماوصلي

عقب السنين مشيبة كل مولود
اليوم من فرقاه دمعي يهلي

ياسعود قلبي راح ماعنه منشود
كب الظلوع وراح مرواح خلي

يامداين خاطري يا عاصمة دنياي

على الله يامداين خاطري يا عاصمة دنياي
على الله يالحروف التايهه في نظرة التايه

على الله يالطريق اللي معاريفك تعب رجلاي
على الله يا مسافر في طريق ماله نهايه

الاياليل لاتسري ولاتشره على مسراي
دخيلك لاتقدم شرهتك من دون مسرايه

على شان الحبيب اللي يسابق نظرتي وخطاي
على نفس الطريق اللي من اجله تعبت اخطايه

ترجيتك تساعدني وانا ماندم على رجواي
إذا شفتك توادع ضيقتي وتعانق ارضايه

وانا اخترتك رفيق الدرب في صمت السنين الجاي
ولا اخترتك يالين اصبحتلي ياعز خويايه

وانا ماعشت وقتي يازماني بين راي وراي
انا عشته على عز ورضيت بحكم مولايه

ولا اطرد من سراب الوقت مايجلب علي مناي
اعيش الواقع الحاضر لعين ايامي الجايه

البارحه يوم كل نام يانايف

البارحه يوم كل نام يانايف
أخوك ماهوب لانايم ولاواعي

يحوف قلبه من همومه مية حايف
من غير هم قديم بين الأضلاعي

هم يزعزع جبال طويق والطايف
مخفيه لي مدة مع باقي أوجاعي

لاشك ماني من غدر الزمن خايف
أعرف دخولي بعد ماأعرف مطلاعي

لكن الأيام منها خاطري عايف
لو إنها تجربة عمر وتمتاعي

يلوفني عن مقاصد خاطري لايف
وأمشي مع الدرب وعيوني لمرجاعي

لاعاد تنشد عيوني ويش أنا شايف
مافي عيوني يسولف لك عن أوضاعي

دوله ال سعود مزبنين الجلاوي

فاح عطر القصيد وغردن الفرايد
من ضمير على بدع المثايل رهاوي

واشلعن من غصون الشعر ندر القصايد
شردن مايروظهن قريب الهقاوي

واستوت طبخت المعنى بجمر الوقايد
لين ذيب القصيد من الوله جاك عاوي

حالفن اني لاعلقها قلايد قلايد
لين ماعاد تطلع من ذهن كل راوي

وكان مارضيت راع الموهبه والمحايد
والله اني لاصير عن القصايد نحاوي

اعشق الشعر واخذ من سنيني فوايد
واتزود وانا اللي ماقطعت الرجاوي

جعل يوما جمعنا في الامارات عايدد
ولتن ماحكمها غير حر النداوي

لين صار الامن والعز والخير سايد
ومن يجيها فقير يروح منها غناوي

اعشق ترابها واحبها حب زايد
ودي اروح عنها مير ماني بقاوي

املكتني وانا قلبي من الحب جايد
وحبها مايداويه الطبيب المداوي

ودعت قايدن غالي وفرحت بقايد
عنده اكبر مصيبه مثل شرب القهاوي

وله عضيد عليها للامجاد رايد
من هو اللي براعي المجد والطيب غاوي

سعد منهو تعزوى به نهار الشدايد
يوم فعل الشجاعي يبين وقت العزاوي

وانا من دولتن فيها وساع البنايد
دوله ال سعود مزبنين الجلاوي

قصيدة التجارب والتي شارك فيها في سباق شاعر المليون

الحياة أفراح وأحزان ودروس وعبر
والتجارب .. صفحة ايامنا وكتابها

مهما زاد الشخص في المال والعز وكبر
وأهدته شهوات نفسه جديد ثيابها

وأبرقت له زيف الأيام وأغرته وعبر
المصير أرضه يلحّف عليه ترابها

والمصايب حملها سم ودواها الصبر
ورحمة الله دون خلقه ما سكر بابها

وعن حياة الآدمي شيمته تبعد شبر
وان فقد من شيمته شي نفسه عافها

وانقبر في الغيب لو ما توفى وانقبر
والحياة اللي بها نقص من يرضى بها

الخلطه السريه

ياعذابي منك ياموتي وياحرماني
زابنك بالله تخفف عني اللي فيه

من عذابي وشهو اللى باقي ماجاني
في عيوني من عذابك صاير ماريه

وانت تدري كل ماتحتاجني تلقاني
يشهد الله عنك ماتقدر تشح يديه

بس تكفي لاتعذبني ولاتنساني
ضمني يانور عيني في حشاك شويه

كل ماشفتك تدخلني بعالم ثاني
عين تنظر لك بشر و الثانيه حوريه

فيك شيطان الهوى ياسيدي وصاني
بالغلا والولف والتقدير والحنيه

والقصيده اليا بغيته فيك مايعصاني
يتباشر في وصوف عيونك السحريه

ياوجودي لو أشوفك يابعد خلاني
يشهد الله لحذف الغتره مع الطاقيه

كيف أنا المجني عليه وكيف صرت الجاني
لعنبوا حظك ضبطت الخلطه السريه

لين من حبك ومن طيشك نسيت اخواني
صرت أجي واروح لاهاذي ولاهذيه

والهوى هو حاكم شعوري وهو سلطاني
لاحصل لي منه لارحمه ولاماويه

أشهد أنه راح فيها تركي الميزاني
ومن يكذبني يعرف الخلطه السريه

تركي 2022 يمدح الامير سلطان بن عبدالعزيز

كريم يانوّ(ن)هبوبه تقوده
لي مدة(ن)وانا عيوني تراعيه

اكبر من الغربي ترازم رعوده
سيله حقاق والمخايل تباريه

اللي وطا حزم البلاد ونفوده
عقب المحل ماناش من عرق يحييه

ايام وسمه ماتجيك معدوده
ثابت على طول السنه من مناشيه

هتان ودان ذعاذيع نوده
تجلا هموم القلب والجرح تبريه

وليا سمك وبله وخيّم ركوده
تفرح به البيدا وتروا ضواميه

فوق البسيطه ماتحدد حدوده
مافيه وادي غير تجري مجاريه

والعشب انواعه تلاعب وروده
طلعه سوا من مدلهم(ن)يساقيه

هذي هماليله وهذي شهوده
كل(ن)يرحب به وكل(ن)يحييه

هذاك سلطان السعد من جدوده
غيث(ن)على غيث(ن)يعافيه

ياراح قلنا الله علينا يعوده
من كثر حبه ودّ شعبه يخاويه

وليا رجع تباشروا في وجوده
شيخ(ن)وحنا برض البلاد لمواطيه

حنا تحت رايه وحنا جنوده
واعمارنا في ساحة الحرب تفديه

القايد اللي منبع الجود جوده
صار الكرم صرح(ن)للأمجاد بانيه

((خلو كرم حاتم))وماضي عهوده
سلطان يعطي شي حاتم مايعطيه

خيره على العالم عسا الله يزوده
لو جيت ابذكر ماتعدد حسانيه

وفاه وصلة لكل دوله وفوده
من مد كفه مايبا احد(ن)يكافيه

وليا قدح من نار فكره زنوده
رايه سديد وكل تايه يقديه

وليا بطش ضاعت روابع حسوده
من سطوته خصمه يضيع هقاويه

هداج تيماء اللي يصدر وروده
ياحي ابو خالد وياحي طاريه

كنت اتمنى وقفتي في وجوده
واليوم انا موجود مابين اياديه

مانيب مجازيك في صدك وهجرانك

ما نيب مجازيك في صدك وهجرانك
ودعتك الله وتلقى واحد ثاني

أتعبت الأعيان والأقدام من شانك
وأنت ولا شيء سويته على شاني

فزيت لك يوم قلت أسمك وعنوانك
لو كان ما تنتمي لأسمي وعنواني

ما جيت أدورك ولا أطق بيبانك
وإلا ترجاك مثل فلان وفلاني

أنت الذي جيت لي وأعلنت بلسانك
أنك على شوفتي جايع وعطشاني

صدقت هرجك ومنطوقك من لسانك
وأقبلت لك مندفع من كل وجداني

ما كنت أفكر يجي في يوم نسيانك
وأنساك وأنت معاهدني ما تنساني

إلا بعد ما قريت الكذب في أعيانك
حاولت أوادعك وأنسى كل ما جاني

خلاص ما نيب متعني على شانك
ودعتك الله وتلقى واحد ثاني

يابنت انا قلبي من البعد محروق

يا بنت أنا قلبي من البعد محروق
لا تحسبين أني قطعت العلاقه

محبتك في القلب و ابراجها فوق
تشيل صوت اسمك في حلم الصداقه

محبتن ما شالها كل مخلوق
بطاقتن يا حيها من بطاقه

يسوقني طاريك لمشاهدتك شوق
واشفق على لمست يدينك اشفاقه

و الصبر زين و كل مطرود ملحوق
شرهت قدم رجلي على عظم ساقه

زرعت لك زرع له اثمار وعروق
وقدمت لك من زهرت العمر باقه

وان كان عندك شك لا ناشك العود
في قلبي الي لك يزيد اشتياقه

الشوق مشتاق اكثر من الشوق
شوق ابدوي ضاعت نياقه

محاورة شعرية بين الشيخ عايض القرني وبين تركي 2017

محاوره شعريه بين فضيلة الشيخ الدكتور عايض القرني الداعية المعروف والمحبوب

وبين الشاعر الشاب تركي الميزاني حبيت انقلها لكم

تركي الميزاني

سلام يا رمز الأدب والدين وبحور القصيد
ياللي بنيت أمجاد وصروح ما تمحاها السنين
إنت بزمنا أكبر عطايا وقتنا وأغلى الرصيد
ولا أقول غير الله يخليكم ذخر للمسلمين

عائض القرني

أهلا هلا بالشاعر المقدام والشهم الرشيد
في حضرتك ننثر سنابل كادها والياسمين
إليا ذكر تركي ذكرنا قصة القول المفيد
أقطف زهور الورد من شعره على مر السنين

تركي الميزاني

الله يبارك فيك ياللي كلما زادوا تزيد
وتبني من الأشعار ما تذهل عقول السامعين
النار فاتح بابها والموت في حبل الوريد
لكن متى تصحى قلوب الغافلين النايمين

عائض القرني

ذكرتني بالنابغة والبحتري وابن العميد
مجالس المأمون في بغداد وأيام الأمين
معاوية نمدح علومه مير ما نمدح يزيد
وش لون نمدح من توهق حيل في قتل الحسين

تركي الميزاني

هذي شهادة والشهادة منك يا دكتور عيد
نبي نعلقها على جدار الزمن للتابعين
أحد بها الدنيا شقي و أحد بها الدنيا سعيد
تمر دورات الزمن والعاقبة للمتقين

عائض القرني

أبي أرسل الأشواق لكن كيف يحملها البريد
أحسن نوصلها وليلة عيد شوق الطيبين
أرجوك خبّر كل مخذول وشيطان مريد
قبر الغزاة ديارنا وحنا عيال الفاتحين

تركي الميزاني

ضاعت حلول المشكلة يا شيخنا مابه جديد
إلا غرور أهل اليسار وصمت أصحاب اليمين
مدري نقول لما مضى من وقتنا ليته يعيد
وإلا عليك نهل كل الدمع يا بدر وحنين

عائض القرني

اليآس ذنب وعندنا أحفاد المثنى والوليد
والشبل من ذاك الأسد وأرض الوطن كله عرين
من يعتصم بالله ربه عاش في عمره سعيد
يبشر بحفظ الله له ويكون في حصن حصين

تركي الميزاني

حنا بلشنا بالقريب اللي عرض دون البعيد
يا صعبها لا حولت ما بين خشم وبين عين
الجرح مبطي مابرى والصبر ذاب مع الجليد
ولا أقول غير الله يعين القانتين الصابرين

عائض القرني

حنا تعودنا على طحن الحجارة والحديد
ولا نخاف الموت لنّا للجنان مسافرين
عدونا والله ما يحميه زيد ولا عبيد
على جماجمهم نشيد مجدنا الباهي المتين

أنتهت المحاورة بين الشاعر تركي والشيخ عايض

سيرة بطل

يافالق الصبح يامولج نهارك بليل
ياجامع الناس في يوم البعث و النشور

عليك كل إتكالي وأنت نعم الوكيل
يا عالم بالمصير و ماتكن الصدور

يالله يالله تهديني سواء السبيل
و تعصم لساني عن الزله وعن كل زور

الشعر موقف وحده مثل حد الصقيل
لو كان كتله من احساس البشر والشعور

ياما رقابي ورقيته براس الطويل
– وياما سبح بي بحور وغصت به في بحور

وانا ليا حان ميقافي قبست الفتيل
و اوقدت من نار فكري للمسافات نور

واليوم لاهنت ياشعري مايخدم بخيل
مادام سلحتك الافكار مانت معذور

قدمك من العز مايروي ظما كل جيل
سوالفه تزرع الامجاد في كل بور

وقدمك لميع الهنادي والقنا والصقيل
وقدمك من المجد ماترويه كل العصور

مسافته عز ماتنقاس كيلو وميل
بركانها ماخمد وامجادها ماتبور

ياموكب الشعر وقف واستمع لي قليل
حتى اني اعطيك للتاريخ رخصة عبور

سيرة بطل ماتغيبها حكاية رحيل
تبقى بوجه الزمن كالنحت فوق الصخور

ماكانت ارض الجزيرة قبل ذاك الاصيل
إلاتفكك عقيدة وانحدار ودبور

نهارها كم قتيل وليلها كم قتيل
جنايزٍ مالهافوق البسيطة قبور

قويهم سلطته تسلب حقوق الذليل
وشيطانهم ساد والظلم انتشر والفجور

وكلٍ لخصمه من اصناف العداوة يكيل
وصدورهم من جهلهم فالمعاصي تفور

مال الاْمن شجرةٍ فيها مقر ومقيل
ولابينهم للمودة في الجزيرة جسور

هذا قبل هيت تخطيها عيون الدليل
وهذاقبل سطوة القرم العزوم الصبور

النادر اللي على العارض يهيم ويخيل
– من يوم عمره عشر شوره غلب كل شور

من قو باسه صنع ممكن من المستحيل
– ومن طيب راسه يحل معقدات الامور

زهابه الصدق والاخلاص حمل الصميل
وسلاحه الدين والتقوى سلاح الغيور

جمَع شتات القبايل لين صارو فصيل
واخوان عقب التناحر والجفا والشرور

وحكم بشرع الكتاب اللي ماغيره بديل
وعم الفرح فالبلاد وساد كل السرور

لامال ميزان غيره مايحيد ويميل
في سطوته ينكسر راس الجهل والغرور

شخصيته مالها في كل جيله مثيل
تجف الاقلام وبمدحه تضيق السطور

والله ليبطن ماجابن ناقضات الجديل
مثله ولااقول في كل النشامى قصور

ويالله يامستجيب للدعاء ياجليل
من عبدك اللي لك مطيع وذليل وشكور

ترسل على قبر ابو تركي صدوق المخيل
وسمٍ يساقيه من غر السحاب البكور

وتهل فوقه بسيل مايلاديه سيل
وترحم عظامه وتغفر زلته ياغفور

وتجمع به المصطفى في جنتك والخليل
وتحفظ عياله مواكير الحرار الصقور

وإنك تجمل وتهديني سواء السبيل
وتعصم لساني عن الزله وعن كل زورٍِِ

والدمع اللي تشوفه ماهو دمع

ياصاحبي واللي خلق نعمة السمع
انك هنا بين المعاليق ثابت

ماجيت لك صدفه ولاجيت لي رمع
وأن غبت عني فرحتي معك غابت

غيري عبث ف الحب بسياسة القمع
لكن لاودت ولايوم جابت

الا محبك من عشق يحسن الجمع
ماشاب حبه لو قوافيه شابت

والدمع هذا اللي تشوفه ماهو دمع
أشعلت عيني لجل اشوفك وذابت