ايه اللى نزلك من بيتك
ليه تتكلمى وترفعى صوتك
تستاهلى كل اللى جرالك
قالها جبان..حط راسه فى الطين..زى النعام
قالها حيوان ..كل همه ياكل وينام
قالها ديوث..غمض عينه عن عرضه
عرى نفسه..خسر شرفه
قالها ضلالى كذاب..تخفى فى الاسلام
يفترى ويظلم وحقيقة يستحق الاعدام
قالها فاسد الضلال عنده الزام
رددها جاهل مابيعرف تلت التلاتة كام
عقله فى اجازة مفتوحة بيمدها عام ورا عام
تيجى تفهمه يقول لك: اهى عيشة والسلام!!
كتروا عليها الكلاب ابشع الكلام
تعال اقول لك مين هى
بس الاول اقف واعمل تعظيم سلام لى
اقصد ليها مش لى
دى شابة مصرية
من خيرة شباب الصفوة والحرية
صنعتها دكتورة
بين الجاهلين مغمورة
معروفة لكل الثوار
مشهورة فى وسط الاحرار
يحترمها الصغار والكبار
حلمت لبلدها بحلم جميل
زيها زى كل ولاد الجيل
نحرر مصر من العبودية
لازم نحس بطعم الحرية
دى الحرية مش اقل من الاكل والمية
يلا ياولاد قولوا وقولوا وعلوا الصوت
معانا ياشباب ده اللى بيهتف مش هيموت
اتشطر عليها الكلاب والاقزام
سحلوها وجروها وداسوها بالاقدام
وقالوا ادام العالم نعريها
لازم نكسر نفسها ونقضى عليها
على مين بتتشطروا ياكلاب
على احلى شباب
ولا على الصغيرين الطلاب
ولا على الاطفال الاحباب
ده اللى عملتوه معملوش عاد وثمود
ولا تساويتوا مع اللى قتلوا اصحاب الاخدود
ورب العزة مارتكب جرمكم ولا حتى اليهود
ملة ابوكم ايه؟؟؟ سؤال حيرنى
ولا حتى كفار ولا مجوس..يارب صبرنى
ده حتى الكافر خاف على اهله
لما استجار به المسلم اجاره وصان عرضه
سؤال حيرنى
ملة ابوكم ايه؟؟؟
يارب صبرنى
حد يجاوبنى عليه
قومى ياغالية ارفعى راسك
هنجيب لك حقك ونعدم اللى داسك
ده اللى حصل مش عيب عليكى
ده جبن منهم ووسام شرف ليكى
قومى يابريئة
ارفعى راسك
قومى ياجريئة
كملى مشوارك
وانت ياجبان ياعديم النخوةاسمع منى
هقولك كلمة
لو عايز تتعلم الرجولة..
هبعتك مدرسة
وهناك هيعلموك بكل سهولة
قدم اوراقك
جهز حالك
البس الطرحة وتعال ندلك
على احسن مدرسة لتعليم الرجولة
مدرسة بنات التحرير..
تحية لكل بنت حرة..تحية لكل شاب حر..تحية لكل طفل حر بفطرته
ورحمة الله على الرجولة..بعتذر لك ايتها الرجولة……
مدرسة بنات التحرير
