مجروح والمجروح لا تنشدونه !!

قاالوا علامك ؟! قلت : مدري علامي !! = مجروح والمجروح لا تنشدونه
من واهجٍ فالصدر ضاع الكلامي = ما عاد باق الا البكا تسمعونه
البارح الذكرى تحدَت منامي !! = ذكرى الغرام اللي تهاوت ركونه
و اومابي الهاجوس شرقٍ وشامي = نبشَ جروح القلب : جور ورعونة
ذكرى رحيل ٍ جالها اليوم عامي = من يومها والقلب يشكي شطونه
مرحوم ياعشقٍ نزيهٍ وسامي = عشقٍ جمع بين : ( القسا والليونة )
له خالص الآشواق // وازكى سلامي = لا ذعذع الغربي وحرَك غصونه
خلاص مالي بالهوا يالانامي = انا الحزين اللي تصافق عيونه
ساتر على جرحي لعين المقامي !! = مقام روحٍ ماتحب المهونة
صابر وصبري يرتسملي امامي = ( صورة بطل يقصر معاديه دونه )
صبر الغريق // ونجدتي من حزامي = حزام جنبٍ ماتراخت متونه
نويت اغامر يا صدوف الجهامي = واجاهد المجنون وانطح جنونه
اما : نجوة وعشت عيشة كرامي = وقام الشرف فالنفس تلعب لحونه
ولا : انتهيت ولا يموت احترامي = اخير من نفسٍ تعيش امغبونه
قلته وانا بين اللحم والعظامي = احس باسمٍ عاش لو يفحصونه !!
اسمً فريدٍ غير كل الآسامي = كرات دمَي لا انمحا يكتبونه
مدري ألم بعد اندثار الغرامي ؟!= ولا وفا للي تلاشت امزونه ؟!
تعبت من ترديد : ( مدري علامي )= مجروح والمجروح لا تسئلونه