اعزها نفسي اقوله وانا صعوط !!

القلب في همه بعد شاف منغط = شوفي بعيني شخص مايع ومغطوط
وجهه كما بسٍ تبا قطٍ ايلط = ماهو حياوي والحيا عنه مربوط
مايع ومشيه راقصٍ وامتغنمط = مشيه ميالٍ كن لاهطه لاهوط
منزوع سلمه والمكايج لها حط = لاهو مره ياناس ولاهوب شاحوط
ماشوف له لحيه ولاشاربٍ خط = الوجه مملوطٍ وبارد وشاموط
والراس شعره منتفش وامتخلبط =متشربكٍ بعقود ماهوب ممشوط
امرّهمٍ شكله وعقله مخبط = بديه مسمكر ماخلا خدش وعفوط
وقلبه ضعيفٍ لو رأى فارةٍ عط = اهلامةٍ وسط السخافات مخلوط
وان هو تكلم كل علمه طلع خرط = هزيل عن جلب الجزيلات قاعوط
قصير عن ثوب الشرف لو تزعمط= يلبس لباس العار ويخاط له خوط
لاواحسايف ياشبابٍ غدا هرط = طربيل همه لبست الجنز واخيوط
يعشق بلاد الغرب فيهم تبسط = مايرتفع لويرتفع طاح محطوط
لاترفعه قدره على الدوم له وط = خبل التشبَه خالي الحس محنوط
وانا احمد الله ماارتض الهون والحط = اعزها نفسي اقوله واناصعوط
وانا احمده شاعر واجيب المثل شخط = افتل بيوتٍ واضحة خط ونقوط
واليا بغيت ارمز ومعناي له شرط = ادس معنى البيت بالرمز مخطوط
وازكى صلاتي عد ماحلن الشبط = على النبي واعداد مارش ناقوط
واعداد ماغيمه برعدٍ لها خبط = واعداد ما فالناس غابط ومغبوط