من خطيت الدرب وظروفي على نفسي بخيله
والظروف ان طاوعتني مارضى حظي وطاب
والأمل أتعبت عيني من كثر ما أستخيله
الصبر مفتاح واحد… والفرج مليون باب
والعزوم ان ضاق صدري بالمروه تنتخيله
والليالي علمتني وش خطاي من الصواب
العطيه بالعطيه هو جزى الطيب بمثيله
والردي ياهو خساره للملامه والعتاب
عشت عمري والفكر في كل ليله … كل ليله
للقمر يسري ويبعد ممتطي ظهر السحاب
من هموم ٍ في زمانه … من جروح ٍ يشتكيله
ماهقيت أحدن مثيله يستحق الانجذاب
لين قلبي قد صدف راعي العيون اللي كحيله
لي صدفت الموت في نظرة عيونه والعذاب
كنت أحسب ان القمر حاز المواصيف الجميله
وشهد انه قد قدر يعلن عليه الانقلاب
يوم صادفني بعين ٍ وحدها تهزم قبيله
وبجدايل شاف فيها الليل وحشه واغتراب
وشهد انه ماعتقني وشهد ان مافيه حيله
ماتريث لين حطم سوق تلعات الرقاب
ياحظوظٍ ٍ وافقتني بعدماهي مستحيله
بعد ماكانت فعيني مثل ما طرد السراب
ذاك لا منه تبادى يخجل الشمس الأصيله
وكل زين ٍ غير زينه قد نوى بالانسحاب
ممتلي من حد راسه لين أثر موطى رجيله
والخصر مهضوم حقّه .. منحرم زاد وشراب
من جماله … من دلاله يفتن الخل بخليله
ياجماعه في وصوفه ضاع عقلي والصواب
وش بوصف في وصوفه .. وين بلقالي وسيله ..؟
وكل وصف ٍ من وصوفه لي مثل طعم العقاب
كل ماجيت آتأمل في وصوف ٍ تنتميله
مثل من هو ينقلونه من عذاب اليا عذاب
ياعذابي من رموش ٍ من على خده ظليله
من على خدن بياضه مثل صفحات الكتاب
والحواجب كل حاجب مثقل ٍ جفن ٍ يشيله
والنتيجه ناعسات الجفن من ثقل الحجاب
والشفايف قد حوت بلسم لمن نفسه عليله
من تذوق منها ما ذاق علة واكتآب
ماعتقني لين ما أدمنت مزة سلسبيله
شل قلبي والثمن ما لذلي منه وطاب
ــــــــــــــــــ(((أخوووكم:ي متعب الروح)))ــــــــــــــــــ
