النوم جافاني ولا عاد بي حيل
مسجون وقيودي جروح اذبحني
من ليله البارح سهيرن لهالليل
مغير اجر الصوت يمك واغني
جريت لك من جور جرحي مواويل
والحانها ونات منك الحقني
لو تجتمع دمعات من عيني تسيل
عليك ياللي كنت فيني ومني
يمكن تسوي نهر اكبر من النيل
نهر من احزاني مياهه توني
جيتك كريم الحب ماجيتك بخيل
مايوم قصرت بهوى من سكني
شربت من حبك دلال وفناجيل
وكنت احسب اني فيك دوم متهني
ياكيف تهديني جروح وتعاليل
وانا هديتك قلبي اللي دفعني
لقلبك وروحي بدت صوبك تميل
وصدقت حبك لين خيبت ضني
ما كنت اصدق فيك كل الاقاويل
وازعل من اللي قال وابعده عني
حتى لو انه غالين في الحشا حيل
بعته لجل عينك وهو ما خدعني
حسبت كل هالناس هذي عواذيل
وتركتهم لجلك ولا احدن تركني
الا انتي يا ساس العنا والغرابيل
ياهي حسافه عن عيوبك عمني
عيوني اللي من العنا مايها يسيل
من جور منهو له وفيت وطعني
وان قدر الله بالليال المقابيل
بنساك وانسى جرح منك لحقني
ولا عاد ابغني ولا عاد ابشيل
ولا عاد ابي ونات فيني توني
بروح انام الحين ماعاد بي حيل
لدموع عين وحب منهو جرحني
سلأأمتكم
