من قصيد الليل والدموع ..

انا بابكي على الماضي ودمعي لو قضى كله
———– يخفّف جرحي اللي كل ما أذكره يكويني

حبايب كثرهم .. ياكثرهم واليوم ياقله
———– أدوّر بس لو واحد من احبابي يحاكيني

بعـَضهم مات يالله تجعلـَه موته على المـِلـّه
———– وبعضهم غاب لاعلمٍ وراه ولا عناويني

وبعضهم حطّ كل اللي مضى طشّه بله سلـّه
———– اشوفه ثم لا سلمـت لا والله ناسيني

وبعـَضهم ( آآآآه ) يسأل واعرف اخباره وانا ادلـّه
———– ولكن فيه خندق نار فيما بينه وبيني

الا ياجرحي اللّي منـْه راسي دوم مختلـّه
———– يقول الناس وش صابه وانا اعرف علتي فيني

انا كلّ المشاعر ماتقاوم حيل محتله
———– مثل دوله غزاها جيشٍ اكثر من هلَ الصيني

او اللّي هاجم الاطفال من سكان رام الله
———– أو اللّي قتـّلوا حتى العجايز في فلسطيني

الا ياشاعرٍ كان اسمك مدوّن برمزٍ له
——- حروف العين هو و السين جاوب هالمسيكيني

ترى ماصابنا واحد انا وانته بسلسلـّه
———– يحزّ القيد بيدينك مثل ماحزّ بيديني

تهـّرب ؟ لاتهـرب كل واحد صاحبه فلـّه
———– انا ماانا بخافي عنك وانته ماانت خافيني

قريتْ اللّي كتبتْ ودمعتي ( يالله ) كم هلـّه
———– كأنك بالقصايد تكتب احساسي وترويني

ترى الدنيا قصيره دقـّها ياخوي مع جلـّه
———– ابا اخليك في لحظه أو انك به تخليني

صحيح انّ النواعم بالضمير سيوف منسلـّه
———– خصوصاً لاسمعت الصوت أو ناظرك بالعيني

ولكنْ وش بيدنا والحطـَب والنار مبتلـّه
———– وش بيد بـْعضهنْ غير الدموع اللـّي تبكـّيني

عذاب الحبّ ماله طبّ الا ياما اكثر الشلـّه
———– جديدٍ بالهوى والاّ من الناس القديميني

عليك الشور منـّي وانت تعـْرف راعيَ العلـّه
———– بها اعرف من طبيبه ( مانطرّي للمزاييني )

كبـِرنا والقلوب رهاف خايف لو تجي تلـّه
———– من الاشواق تقطع يارفيقي هالشراييني

ولا مانع على الماضي بكانا يبرد الغـّله
———– ونسهـَر والعرب ياصاحبي ساعات نيميني .!

لقراءة ردود و اجابات الأعضاء على هذا الموضوع اضغط هنا
سبحان الله و بحمده

اترك تعليقاً