يا قلب شل ضيقتك واترك زواياهم
مالك وما للقلوب اللي بلا رايه
معقول تنسى ولا تذكر سواياهم
غلطاتهم حبر ! ليش تكون محايه
ما عاد الايام بيض ولا نواياهم
لو يلبسون البياض فــ أكذب روايه
شف منتهاهم وتعرف ويش مبداهم !
لو النهاية تكون احياناً بدايه
قل للظما يستريح ولا تجي ماهم
لا للوسيلة ولا مليون للغاية
أعذارهم لو تبللها تحاياهم
ما كل عذرٍ يسكر خلفه حكايه
يكفيك صدقك وتكفيهم خطاياهم
الصدق واضح ولا يحتاج لقرايه
لا يشغلك ما تشوفه في زواياهم
في يدك رايه ! ولا تلمح لهم رايه
