اذا صرت طفران <<اشتغل كداد

المهم

انتم تعرفون من اول ان ابوي والدمقراطيه اخوان
يعني ابوي دمقراطي من الطراز الاول<<حشى طياره مو ابو
المهم
في ايام يكون الشخص بطران <<يعني معه فلوس ما يدري ايش يسوي فيها
وفي ايام تكون مطفر بعنف <<ما تدري وين راحن فلوسك

مره كنت انا و واحد من ربعي بنروح للرياض<<ماسكه غلط نبي نتمشى وقت الدارسة

بس في مشكله
اننا في ايام الطفره <<<<على الصاجه<<قصدي على الحديده

وانا اروح لابوي
واحب راسه<<مو بالعاده
واجلس جمبه
وهو ياناظرني بنظره حتقار<<احس انه ما يطيقني
قال : لا تقولي هالحبه ما وراها شي قل وش عندك خلصني
<<<مشكلة ابوي فاهمني
قلت: ايش دعوه يبه ما في شي بس ودي اجلس معك شوي
قال: اقول اخلص وش تبي<<ما يمزح
<<هنا انا عرفت انه كاشفني ..لازم اقوله
قلت: طلبتك يا ابو عزوز ان تقول تم
قال: ليش ما تقول وش عندك قبل ما يجيك هالفنجال<<<من عرفت ابوي وهو يتقهوا ما ادري متى تخلص هالدله الي عنده

قلت: يا ابو عزوز انا و واحد من الشله نبي نروح للرياض هاليومين
<<الا ابوي يلتفت علي وعيونه طالع منها شرار<<متأثر بافلام الكرتون
قال: وش تقول<<< انا هنا صكتني ام ركب
قلت: تكفى خلني اروح <<واقعد اصيح عليه شوي
<<حسيت انه رحمني<<لاني جالس لي خمس دقايق ولا جاني هالفنجال الي معه
قال: تبي تروح رح بس فلوس ماني معطيك

<<<يا ليل …يعني لا تروح بس مزبرقها

قلت: خلاص بس انت قلي رح وازهلها
قال رح راحت روحك<<يا شين دعاوي هالشيبان

وانا اروح وافكر من وين لي بمصروف الروحه<<وانا افكر وافكر وافكر
طرت في بالي الحنونه

يـــــــــــــــــــــــمــــــــــــــــــــــــه <<<هذا انا انادي امي

امي: وحمى وش تبي؟؟
قلت: يمه طلبتك ابي فلوس
قالت: من وين اجيب لك انا ام السالم تطلبني وللحين ما عطيتها<<اموت واعرف متى بتعطي ام السالم هذي<<من عرفتها وهي مسلفه امي
قلت: ما لي دخل ابي فلوس ابي اسافر للرياض مع خويي
قالت: خلاص بشوف ام المزعل عشان تسلفني <<ما خلت احد ما تسلفت منه خخخخخ

المهم
عطتني امي 500 ريال<<<< هذا بعد حب الخشوم وتطلبها سبوع
<<<500 ما تكفي لسفره مثل هذي بس قلت بنحاول ندبر انفسنا بها

وطلعنا انا وخووي للرياض في سيارته فورد 2022

المهم
ومسكنا الخط
ولله الحمد وصلنا للرياض<<<عاصمتنا الحبيبه<<الحمد لله على السلامه

واستاجرنا شقه على قد فلوسنا

وفليناها ورحنا لحراج ابن قاسم<<كل شي قد فلوسنا خخخخخ
<<<انا في بالي ان معي 500 ومع صاحبي 500 اكتشفت ان خويي ما معه شي بس بعد ما خلصت فلوسنا <<يا ليل ,,كيف بنرجع لرفحا

وبعد تصفيق خويي وتوطي في بطنه ومن القهر خليته ينضف الشقه <<ابي اخليه يشتغل بطيح الي في راسي
واجلس افكر وافكر وافكر وجت في بالي فكره محترمه<<فوق راسي طلعت لمبه مثل افلام الكرتون

المهم
واقول لخووي ايش رايك نضف كم واحد من الي يبغو يسافرو للشمال وناخذ ايجار منهم<<<بالعربي كداد
<<خويي ما يعرف كلمه لا <<كل شي عنده قداام = اوك = ابشر =خلاص <<انتم عاد اختارو
قلت نروح للبطحاء وناخذ لنا كم واحد
ونروح هناك

ونشوف الكدادين المحترفين
واحد شنبه كالع برا سيارته وشماغه علي كتفه ويقول دمام دمام دمام
وثاني معه زقاره و34532 شطب في وجهه ويقول بريده المدينه بريده المدينه
<<< و خششنا انا وخويي ما تدل على اننا نصلح كدادين انا لابس برمودا وخويي جنز <<<كدادين هالجيل
ما نصلح مع هالاشناب خخخخخخخخخ

المهم وانا اقعد انادي : رفحا الحفر رفحا الحفر<<لان الحفر على طريق رفحا قلت خلني استفيد منها

ويجي واحد وش حليله
قال بتروح الدمام وش سيارتك
قلت هالفورد اللي ماهنا املح منه <<لازم امدها عشان يجون
قال ايه الفورد مريح ابروح معك
قلت اركب خلني اشوف اذا في احد غيرك
شوي الى معه كيسه شكيت فيها
قلت تعال تعال وش هالكيس ترا ريحته مسببه لي ذعر ورعب
قال هذا كيس حلبه
قلت ليش انت بتسافر والا بتزور وحده بالنفاس<<<توها مولده
قال احسن انا اصلا شاكك فيكم تضيعو الطريق
<<وانا وخويي نناظر بعض ما علينا من العذال<<اخس يا ابراهيم توفيق<<منو هذا اول مره اسمع عنه خخخخخخ
المهم

سالت كم واحد عن الحساب قالو لي الراس 70 ريال
وانا معي فورد واريح يعني بيطق 85 براحه<<<مخ تجاري
والحمد لله ركبوا معي 4 وانا يشتغل فيني عرق النذاله
قلت دخان ما في الي يبغى الدوره(الله يكرمكم) ما في
تقولو غير الي في المسجل انزلكم <<<الله يلعن ابو الذل الي معيشهم فيه
ونروح نعبي بنزين ورحت لسوبرماركت واشتري لهم بباسي وليز<<مدلعهم خخخخ
ونحرك الى رفحا الحبيبه
في واحد ما خش مخي<<<احس انه يكرهني خخخخخخ

شغلت المسجل على خالد عبدالرحمن << تقوى الهجر<<والله اني اخق عند هالاغنيه
قالي: عليك الله تسمعنا محمد عبدو
قلت:انا ايش قلت ؟؟ المسجل ما لكم شغل فيه
قال: اشتهي اسمع لابو نوره
قلت تبي تسمع خالد والا انزلك<<<للحين ماسكه ذل
قال : خلاص لا محمد عبدو ولا تنزلني
المهم

وفي الطريق في نقطه تفتيش
وقفنا العسكري وقال :مين الي نعك
قلت :ربعي<<<هذا الي ما يعرف يكذب
قال ما الظاهر انهم ربعك المهم عطوني اثباتاتكم
كلنا عطيناه الا الي يبغى محمد عبدو
قال للعسكري: يا حظرة الظابط اني نسيته في مكان فلا اعلم فين وضعته وعليك وجه الله ان تسامحني وتتركني في حال سبيلي والله اوعدك ابلغ عنها واطلع غيرها
قال العسكري:ما في شي يثبت هويتك؟
قال:معاي كيف مامعاي .. ويطلع دفتر خخخخخخ قال هاشووف اسمي<<<محشش هذا
قال العسكري: اقول انزل بس
<< يا ليل عاد انا مال من هالخشه قلت خلهم انشالله ياخذونه يحسبونه يمني منحاش
قال خويي مهبول انت بتجي بظهرنا الحين .. بيقول ان حنا مهربينه
وانا انزل للعسكري
قلت يبن الحلال اخلص علينا انا كدااااد << طبعا قلتها بملئ فمي <<مخربها
نا كداد ورزقي على هالمهبل لاتاقف عاد الله يهديك بطريقي وبعدين خذ هذا اثباتي

<<هو يوم شاف اثباتي من رفحا
قال تعرف فلان الفلاني
قلت :ايه عرفته يا حليله والله انه رجال اسنافي<<والله اول مره اسمع عنه بس تسليك عشان نمشي
قال :قله فلان (اسم العسكري) يسلم عليك
قلت يوصل انشالله
قال: الله يسهل عليكم
وانا امسك هالعله من رقبته واركبه السياره
الله لا يبارك بالفلوس الي جمعتني فيك..بما انك شبهه بوصلك بميه تبي والا انزلك عند العسكري الحين<<يا حبي للنذاله
قال :ادفع بس وصلني

ووصلنا للحفر ونزلناه ووصلنا رفحا والحمد لله على السلامه

الحين معي 100 حقت العله وثلاث 85 <<عاد انتم احسبوها

والله اعجبتني الحركه وصرت كداد وقت الطفرات

هذا ما حصل في طريق الرياض رفحا

*اتمنى ان تنال اعجابكم*