في هجوسي دق ناقوس الخطر يقرع قريع !!! شعر رائع

مرحبا واهلين بالشعّار والذوق الرفيع = يوم قل الذوق عند النّاس في هذا الزمان
يوم كلٍ طبّ جوف السوق يشري مايبيع = ارتفع سعر الهزيلة .. وانخفض سعر السمان
والطعام الدّسْم ولّى مابقى غير الضريع = مايفيد ولا يسدّ الجوع .. وايضرّ اللسان
صارت الدعوة حراجٍ بين بايع مع شفيع = والذي ماله شفيعٍ مايحصلّه مكان
ماستمعنا بالهزيلة لو تغنّا ابكل ريع = بالحناجر زيّنوها: ليلا دانا ليلا دان
لو تُسلّط حولها الاضوا واشاد ابها المذيع = حيّو افلان الفلاني .. ثمّ حَيّوا هالفلان
مايهز القلب غير الذيب بالصوت الرفيع = لا تعّلا فوق رجمه مارتضى صوت الطمان
يعتلي فوق النوايف ماله ومال الظبيع ؟!! = سجّ رجله في دروب العز .. طّلاق العنان
رافعٍ صوتٍ صليبٍ .. من ظهر ذيبٍ شجيع = صوتٍ ايشيل المعاني فيه من سحر البيان
ذاك صوتٍ فاقدٍ هالوقت جمعٍ له سميع = هكذا حاله تردّى // رحمتك يالمستعان
الخريف اليوم في عين العرب : ( فصل الربيع ) = وافطروا عيد الفطر من قبل لا يقض ارمضان!!!
هكذا حال البشر .. ياوينه الصدر الوسيع ؟؟ = يقبل الواقع .. ولا يجري ورا كل احتقان
ضاعت العالم مابين الشرّْس والحمل الوديع = كل واحد حد سيفه ثم قفّاه السنان
لاقمر ساطع ولا شمعٍ بنورٍ له يميع = الظلام ايسود .. وايعمّ المغامر والجبان
والوداعة لو يقلّ الطيب تبقى ماتضيع = دام سطح الارض يمشي فوقها ذرب اليمان
والنواقص مانفتّش خرجها عيبٍ شنيع = مالها معنا مجالٍ .. لاعهود ولا ضمان
في هجوسي دق ناقوس الخطر: يقرع قريع = من حدود ابقيق يقرع لين ياصل لحلبان
هكذا رمّزتها .. والرمز جايز للجميع = للفتى الحق ابرموزه .. دام به قلب ولسان
والختام ازكى صلاتي لافضل الخلق الشفيع = للرسول الهادي اعدادالجموع إنسٍ وجان